Jurnal Warga, daridesa.com – Puasa kaga berasa udah Mao malem ke 19 aja dua ari lagi berarti masup malem ke 21 malem dimana umat islam semangkin kenceng ama nyeng namanya amalan puasanya. Karena di akhir sepuluh puasa ada nyeng namanya malam Lailatul qodar atawa nyeng disebut malem seribu bulan.
Kalo di tradisi Betawi pinggiran kalo ari malem dua satu entuh ada malem disebut nyeng namanya tradisi maleman. Tradisi maleman entuh sendiri berupa selametan orang -orang kampung sekitar pada bawa makanan khas maleman yaitu ketupat, lepet, kue pisang, unti, abug dan lainnya.
Tradisi maleman biasanya dikerjakan setiap tanggal 21, 25, 27 dan 29 tergantung ama kampungnya nyeng leluhur mereka dulu make tanggal berapa. Tradisi maleman enjh selamatan dan masakanya khusus bikin kue aja kaga make sayur dan nasi. Dengan bikinnya arinya beda entuh kalo nyeng punya sodara banyak bisa pada gantian saling ngejotin ama nyeng namanya kue maleman kaga mutus datang terus ampe ari mo malem takbiran.
Dalam rangakaian maleman ada nyeng namanya tradisi ngejotin atawa nyorog, biasanya kue nyeng kita bikin sebelon diselametin sebagian buat kita silaturahmi bawain kue ke orang nyeng lebih tua dari kita seperti orang tua kita, uwak kita, bibi, mamang ama guru.
Nah tradisi bebawaan enih nyeng disebut nyorog atawa ngejotin. Dulu kalo udah ari mo maleman orang udah pada sibuk ama nyeng namanya nganam bikin kulit tepat ama lepet,jemuran baju pada dipake buat jemur daon buat bikin kue dan semua rumah kudu pada bikin. Entuh lepet ama tupat dimasak pake kaleng bekas minyak kelapa atawa di paso kwali nyeng dibikin dari tanah liat.
Besok malemnya abis kue separonya diejotin, entuh kue baru dah dikumpulin di mesjid atawa langgar buat disedekahin di malem yang disebut maleman. Abis taraweh para jamaah kaga pada pulang pada ngikut sedekah dulu. Resep kalo udah nyeng namanya sedekah maleman entuh bocah pada cokoh kueh buat dibawa pulang.
Jamaah taraweh nyeng pada ngikut selametan pulangnya pada nenteng berkat asil dari kumpulan kue-kue nyeng mereka pada bawa. Sayang mangkin kemarin entuh tradisi ngejotin dan maleman mangkin ngilang aja…
Bang ILok
Ketua Yayasan kebudayaan Orang Bekasi (KOASI)
Berita Dari Desa | Membaca Kampung Halaman