Jurnal Warga, daridesa.com – Kata Baba nyeng namanya orang Betawi ampe gini ari masing aja ada nyeng namanya adat kawinan duren ketemu duren, apa maksudnya? Entuh anak orang nyeng punya banda kawinnya ama nyeng bebanda juga.
Nah orang nyeng bandanya kaga biasanya dijodoin ama nyeng bandanya kaga juga, karena nyeng namanya orang Betawi ogah dibilang numpang idup apalagi ama nyeng namanya dikata numpang idup ama besan uman lantaran entuh besan orang adaan. Jadi bagen idup rada susah ge nyeng menting harga diri tetep kejaga.
“Iya Tong baba luh bener, luh kudu ngaca.. Luh sapa lah noh dia sapa jangan ampe uman gara-gara luh demen ama dia keluarga kita jadi bahan omongan! ” Kata Enyak ama Jaya anaknya nyeng kiatannya udah mulai bedemenan. Jaya nyeng lagi dinasehatin asyik nyiangin kembang duren nyeng ada ditampah.
“Kita orang kaga punya tong luh kudu ngiat kalo nyari demenan .. Bukan baba kaga setuju ama entuh bocah.. Tapi eluh tau pan entuh bocah anak sapa? .. Anak penggede, pegawe lah eluh uman anak bekas panjak Topeng!” Sambung Baba Lihun bari ngerapiin jalanya nyeng rada robek.
“Iya nyak, Ba Jaya ngarti Jaya udah ngukur juga Kalo Lies kaga setimpal ama Jaya.. Tapi sebagai orang Betawi nyeng pengen maju Jaya mo buktiin ama semua orang bawa Jaya juga bisa jadi orang.. Sapa bilang anak Betawi ketinggalan jaman.. Jaya mo buktiin kalo Jaya juga bisa jadi orang gedean” Kata Jaya bari narik nafas , kembang duren di tampah udah kelar disiangin.
“Udah ah Nyak jangan ngomel mulu ngapa, entuh kembang duren cuci goreng campur ikan teri perut Jaya romanah udah rada kelantih inih” kata Jaya bari megangin perutnya nyeng rada perih karena belon nyarap.
“Lah onoh pan di meja ada rebusan Sukun ama kimpul luh makan aja dulu biar entuh perut luh kaga sakit! ” Kata Enyak bari beresin kembang duren nyeng masing ngambak di tampah.
****
” Eh.. Tong baba kaga salah denger kalo luh punya Cita-cita mo jadi orang gedean?.. Nah nyeng enih baba dukung dah! ” Kata baba bari sedikit bebisik biar kaga kedengeran ama enyak apa nyeng dia omongin ama Jaya.
“Luh ngomong dah ama enyak luh.. Pan enyak luh punya tanah noh 70 meter bagian dari engkong luh nyeng di Pasar Minggu jual dah buat modal luh sekola lagi ” Kata baba lagi rada serius nganam Jalanya ampe salah anam.
Jaya kaga lantas jawab ajaran babanya , bukan lantaran apa nyeng diucapin baba entuh salah, omongan baba bener dengan tanah 70 meter di Jakarta sekarang bisa modal biaya buat dia kuliah ampe kelar.
“Ogah ba entuh hak enyak … Jaya pengen jadi orang tapi dari usaha Jaya dewek… Mulai besok onoh warung nyeng udah lama mangkrak Jaya mo benerin lagi ah.. Jaya mo jualan nasi uduk nerusin almarhum uwak kita dulu! ” Kata Jaya semangat beud dah apa lagi entuh nyeng namanya bayangan Lies Saodah udah mampir di jidatnya.
“Nah enyeng enih enyak dukung.. Enyak nyeng bikin nasi uduknya dah ..kaga kalah ama bikinan uwak empuan luh dulu dah pokoknya” Kata Enyak ikut ghiroh denger anak lakinya mao usaha bagenin tibang mo jualan nasi uduk ge, nyeng penting mah halal dan berkah.
Nyeng ada di otak Jaya saat enih bagaimana dengan hasil kembali ngidupin Nasi uduk Wak Ronah nyeng pernah kesohor di jamannya bisa buat biaya dia sekola lagi … (Bersambung).
Penulis : Bang Ilok
Berita Dari Desa | Membaca Kampung Halaman